Eru fjöldamorð ofbeldisverk?

Fæstir ættu í erfiðleikum með að svara þessari spurningu. En þegar kemur að guðinum hans Magnúsar Inga þá getur hann ómögulega svarað henni.

Magnús Ingi byrjaði á því að svara grein eftir vísindasagnfræðinginn Steindór J. Erlingsson. Í þeirri grein fjallar Steindór meðal annars um plágurnar sem guð sendi yfir Egypta. Síðasta plágan var auðvitað frumburðadrápin, sem er lýst svona í biblíunni:

Önnur bók Móse 12:29
Um miðnæturskeið laust Drottinn alla frumburði í Egyptalandi, frá frumgetnum syni Faraós, sem sat í hásæti sínu, allt til frumgetnings bandingjans, sem í myrkvastofu sat, og alla frumburði fénaðarins.

Steindór kallaði þetta "ofbeldi". Það finnst Magnúsi "mjög guðleysisleg túlkun". Magnúsi finnst sá sem notar svona orðalag ekki "hlutlaus í frásög og ekki hægt að taka alvarlega sem fræðimann."

Magnús vill ekki kalla þetta ofbeldi: "Ef maður meðtekur að Guð hefur skapað mann, m.ö.o. að maður sé sköpun Guðs, þá getur sköpun Guðs ekki gagnrýnt fyrirætlanir Guðs með sköpun sína."

Það er sorglegt að kristin trú skuli hafa þessi áhrif á fólk. Að það vilji ekki viðurkenna að fjöldamorð sé ofbeldisverk. Og að það sé það niðurbrotið og undirgefið að það geti ekki hugsað sér að hugsa gagnrýnt um guðinn sinn, sjái ekkert athugavert við það að guðinn þeirra fremji fjöldamorð.

Og auðvitað er Magnús búinn að loka á athugasemdir frá mér.

Athugasemdir

[Jón Steinar Ragnarsson, 6.8.2007 kl. 18:04]

Er ekki rétt að menn komi sér saman um hverskonar fyrirbrygði Guð sé í stað þess að persónugera "hann" sem einhverskonar geranda illverka. Og síðan mætti nú kíkja á áræðanleik þessara frásagna um meintar hamfarir. Hafi þær hent eru það orð eins skrásetjara að "hann" sé gerandinn.  Ef svo Guð er allt og í öllu allstaðar og alltumýkjandi, havað er "hann" þá? Varla risastór manneskja með mannshugog vilja. Persóna, sem greinir að og dregur í dilka.  Þessi trúarbragðaumræða beggja aðila er algerlega út í hött og tilgangslaus.  Hvers vegna og til hvers eru menn að ergja sig þetta yfir rykföllnum bókstaf? Hvert er markmið þitt?

[Hjalti Rúnar Ómarsson, 6.8.2007 kl. 18:26]

Jón Steinar, auðvitað eru þetta bara orð skrásetjarans. Það skiptir ekki máli. Við gætum alveg eins verið að ræða um skáldsögu. Ef einhver í skáldsögu drepur helling af fólki, þá getum við samt kallað það "ofbeldi".

[Hjalti Rúnar Ómarsson, 6.8.2007 kl. 18:27]

Já, og markmiðið er auðvitað að benda á hversu ógeðslegar afleiðingar kristin trú hefur á hugarfar.

[Mofi, 7.8.2007 kl. 10:33]

Það er algjörlega Guðs að ráða hver fær Hans gjöf sem er lífið.  Þegar maður síðan talar um líf og um Guð þá er þetta líf fyrir Guði aðeins örskömm stund og aðeins skuggi af því lífi sem við eigum að fá.  Þegar Guð tekur endanlega líf frá fólki þá er það sannarlega sorgarstund en það mun vera réttlátt.

[Hjalti Rúnar Ómarsson, 7.8.2007 kl. 14:31]

Mofi, voru frumburðadrápin ofbeldisverk?

[Mofi, 7.8.2007 kl. 17:00]

Nei, ég sé það ekki þannig.  Guð hefur fullann rétt til að taka líf þar sem það var Hans gjöf til að byrja með.  Kannski alveg út úr kú en ímyndaðu þér að þú værir guð og að "steinarnir" sem þú mótaði til að hafa líf væru að gera eitthvað sem þú hefur ákveðið að sé slæmt. Er það einhver glæpur að "þú" takir frá þeim það sem þú gafst þeim til að byrja með?

Má kannski líkja þessu við einhvern sem borgar ekki rafmagnsreikninginn sinn og vegna þess þá er lokað fyrir rafmagnið hjá honum.  Lífskraftur Guðs er eins og rafmagnið og við eigum enga heimtingu á því, það er gjöf sem við eigum að vera þakklát fyrir.

[Hjalti Rúnar Ómarsson, 7.8.2007 kl. 17:47]

Mofi, hvernig í ósköpunum skilgreininr þú ofbeldi? Ég myndi halda að fjöldamorð væru í eðli sínu ofbeldi, hvort sem þau ættu rétt á sér (get ekki ímyndað mér þannig aðstæður) eða ekki.

[Mofi, 8.8.2007 kl. 13:01]

Hjalti, ég sé þetta ekki sem morð þegar Guð tekur sinn eigin lífskraft frá þeim sem Hann upprunlega gaf en eiga hann ekki skilið.  Er það morð þegar einhver deyr úr elli?

[Hjalti Rúnar Ómarsson, 8.8.2007 kl. 16:41]

Mofi, ertu sáttari við orðið fjöldadráp?