Prestur skilur ekki þrenninguna

Þessi titill er í raun og veru rangur. Enginn skilur þrenninguna, því að hún er óskiljanlegt bull og vitleysa. Trúmenn nota auðvitað ekki þessi orð heldur tala þeir um að þrenningin sé „leyndardómur“.

Þrenningarkenningin á að vera mitt á milli tveggja villutrúarkenninga, sem báðar eru auðskiljanlegar. Annars vegar er það þrígyðistrú, sú trú að það séu þrír guðir. Hin villutrúarkenningin er miklu algengari, og ef einhver segist skilja þrenninguna, þá er hann að öllum líkindum að ruglast á þrenningunni og þessari villutrú. Ríkiskirkjupresturinn Þórhallur Heimisson er gott dæmi:

Íhugunarefni þrenningarhátíðar er eðli Guðs og hvernig Guð mætir okkur í lífinu. Nafn þrenningarhátíðarinnar er dregið af því að Guð birtist okkur á þrennan hátt, sem þrjár persónur. Þessi birting Guðs í heiminum hefur frá fornu fari verið kölluð heilög þrenning.#

Þessi villutrú kallast módalismi og er í stuttu máli sú trú að guð sé þrír að því leytinu til að hann birtist okkur á þrennan hátt.  Það er engin furða að Þórhallur telji þrenninguna vera einfalda og auðskiljanlega, hann er villutrúarmaður.*

*Það er auðvitað mögulegt að hann viðurkenni að þrenningin sé "leyndardómur", en að hann lendi bara í módalisma þegar hann reynir að útskýra hana.

Athugasemdir

[þórhallur Heimisson (IP-tala skráð) 20.6.2009 kl. 14:18]

Var að sjá þetta - eins og venjulega ruglast þú í ríminu vegna hatursins á kirkjuni og okur prestunum.

Og misskilur auðvitað allt.

Að tala um persónur eða persónuleika Guðs er komið frá fronkirkjunni sem fékk skilgreininguna úr leikhúsinu. Persóna er grískt hugtak sem merkir eiginlega leikari sem leikur ákv hlutverk í leikhúsi. Í grísku leikhúsi töluðu menn í gegnum grímur, en persóna er gríska og þýðir að tala í gegnum " per (í gegnum) sonare (hljóma). Sami einstaklingurinn gat leikið margar persónur, alveg eins og sma persónan eða einstaklingurinn getur átt sér margar hliðar.

Tökum þig sem dæmi. Þú átt þér örugglega marga persónuleika.

Ein er reiður Vantrúarpúki.

Önnur er ef til vill ljúfur sonur eða bróðir.

Kannski ert þú eiginmaður, faðir, vinur.

Svo áttu þér enn aðra hlið í vinnu, skóla eða öðru slíku.

Samt ert þú einn og hinn sami.

Þannig er Guð - hann birtist okkur á þrennan hátt, sem þrír persónuleikar eða persónur hins eins. 1x1x1=1

Þú verður nú að reyna að skilja hugtökin sem þú ert alltaf að ráðast á minn kæri.

[þórhallur Heimisson (IP-tala skráð) 20.6.2009 kl. 15:34]

PS ein smá leiðrétting í viðbót minn kæri.

Módalismi heitir sú kenning að Guð sé ein persóna sem birtist á þrjá vegu í sögunni.

Trinitarianismi - þrenningarkenningin - gengur aftur á móti út á - eins og ég segi - "að Guð birtist okkur á þrennan hátt, sem þrjár persónur".

Kynna sér málin betur -ekki vera eins og hinir Vantrúarbullukollarnir sem skrifa fyrst og hugsa svo- þú er nú allt of góður viðmælandi til þess

[Andri (IP-tala skráð) 21.6.2009 kl. 18:23]

Þetta er nú fínasta úrskýring á þrenningarkenningunni, hef heyrt þær margar enda ekki einfalt mál að skýra hana út :)

Ég hef persónulega ákveðið að hafa ekki alltof skilgreinda kenningu þar sem ég er ekki viss á þessu sjálfur.

En segi bara eins og Biblían segir:

Jesús er Jahveh, Guð

Jesús gat talað við Jahveh, Guð

Það eru þrír sem vitna, og þessir þrír eru eitt

o.fl.

en ég treysti mér ekki alveg til að fylla í eyður sem ég skil ekki til fullnustu.

Ég hef hins begar átt nægar reynslur með Guði til að vita að Orð hans er satt, þó ég skilji það ekki alltaf.

[Hjalti Rúnar Ómarsson, 22.6.2009 kl. 20:35]

Var að sjá þetta - eins og venjulega ruglast þú í ríminu vegna hatursins á kirkjuni og okur prestunum.

Nei, eins og ég mun sýna fram á þá er ég ekki að ruglast, heldur þú. En ég mun ekki segja að það rugl sé orsakað vegna haturs þíns á trúleysingjum.

Persóna er grískt hugtak sem merkir eiginlega leikari sem leikur ákv hlutverk í leikhúsi. Í grísku leikhúsi töluðu menn í gegnum grímur, en persóna er gríska og þýðir að tala í gegnum " per (í gegnum) sonare (hljóma).

Persóna er úr latínu, og ég veit ekki hvernig þér gæti dottið í hug að sonare væri í grísku. Endingin er augljóslega í latínu (-are) en grískar sagnir eru gefnar upp í 1p et nt, enda á oo (ómega).

Sami einstaklingurinn gat leikið margar persónur, alveg eins og sma persónan eða einstaklingurinn getur átt sér margar hliðar.

Þetta er fín samlíking, til þess að útskýra módalisma. Sama á við talið um þrjár hliðar mínar.

Módalismi heitir sú kenning að Guð sé ein persóna sem birtist á þrjá vegu í sögunni.

Trinitarianismi - þrenningarkenningin - gengur aftur á móti út á - eins og ég segi - "að Guð birtist okkur á þrennan hátt, sem þrjár persónur".

Að guð sé einn enn birtist okkur á þrá vegu í sögunni er kallað "historical modalism", en að guð sé einn en birtist okkur á þrennan hátt er kallað "functional modalism".