Alfa námskeiðið er drasl

Í gær rakst ég á námsbók Alfanámskeiðsins á bókasafninu og ákvað að kíkja á bókina. Eftir að hafa lesið fyrstu þrjá kaflana þá finnst mér það jaðra við vörusvik að auglýsa þetta sem námskeið. Réttara væri að kalla þetta trúboð. Fólk er að borga fyrir þá "þjónustu" sem Mormónar og Vottar senda ókeypis heim til manns

Ég hef alls ekkert á móti því að fólk læri um kristna trú, ég er í rauninni mjög fylgjandi því, en þessi "fræðsla" frá guðfræðingnum og prestinum Nicky Gumbel er vægast sagt drasl. Síðan er Þjóðkirkjan að kenna þessi námskeið, í alls 17 kirkjum/sóknum skv. heimasíðu Alfa á Íslandi. Ótrúlega kaldhæðnislegt í ljósi þess að prestar hennar eru sífellt að segjast hafa svo mikla þekkingu á trúmálum. Þeir hljóta að vita betur eftir að hafa lært um Nýja testamentið í mörg ár upp í Háskóla. Er það ekki frekar óheiðarlegt að kenna hluti sem þú veist að eru ekki sannir, bara til þess að lokka fólk í trúna þína?

En hvers vegna kalla ég þetta drasl? Ástæðan er sú að Gumbel þessi virðist ekki átta sig á muninum á því að tala um áreiðanleg rit í þeirri merkingu að við séum viss um hvað stóð í upphaflega handritinu og áreiðanleg rit í þeirri merkingu að það sem ritið 
segir frá hafi líklega gerst.

Með öðrum orðum: Ef þú prentar Mogga dagstins í dag í 1.000.000 eintökum, en ekki 1.000, þá hefur það engin áhrif á sannleiksgildi Moggans.

Einfalt ekki satt? Séra cand. theol. Gumbel fattar þetta ekki.

Vegna þess að Nýja testamentið er afskaplega áreiðanlegt þegar kemur að því að vita hvað
stóð upphaflega í því (textarýni) þá finnst Gumbel allt í lagi að gera ráð fyrir því að allt, já allt, í þeim sé satt og rétt. Sem dæmi notar þessi hálfviti söguna af Tómasi sem rök fyrir þeirri skynsömu afstöðu að Jesú hafi ekki litið á sig sem guð.

Tómas svaraði: Drottinn minn og Guð minn!
Jesús segir við hann: Þú trúir, af því þú hefur séð mig. Sælir eru þeir, sem hafa ekki séð og trúa þó. (Jh 20:28-29)

"Auðvitað hélt Jesús að hann væri guð, við getum verið ansi viss um hvað stóð upphaflega í Jóhannesarguðspjalli, og þar af leiðandi gerðist allt það sem er sagt frá í því raunverulega. Í því
guðspjalli segir hinn upprisni Jesús að hann var guð, þannig að augljóslega sagði Jesús að  hann væri guð!"

Öll bókin byggir á þessari barnalegu nálgun að Nýja testamentinu. 
Á þessum sandi reynir hann síðan að sanna upprisuna og fleiri svona vitleysu.

Boðskapurinn er þessi: Ef þið viljið fræðast um kristna trú þá skuluð þið ekki fara á Alfa-námskeið. Kaupið ykkur frekar einhverja inngangsbók um Nýjatestamentið og frumkristni og lesið hana. Örugglega ódýrara líka....og talandi um peninga, hvers vegna setja þeir Alfa-bókina ekki á netið í staðinn fyrir að selja hana bara?

Athugasemdir

[Jón Steinar Ragnarsson, 14.2.2007 kl. 20:19]

Óskaplega ertu eitthvað neikvæður og bitur ljúfur.  Hverju viltu breyta?  Settu nú saman pistil um það hvernig þér finnst trúin horfa við þér og hvað þú teljir rétt í því samhengi.  Þá verður kannski auðveldara fyrir okkur hin að skilja hvers vegna þú samsinnir engu í trúarlegu samhengi.

Með vinsemd og vináttu. 

[Hjalti Rúnar Ómarsson, 14.2.2007 kl. 22:31]

Jón Steinar, mér finnst það jákvætt að brjóta niður slæma hluti.

Þú spyrð hverju ég vil breyta. Ég vil frelsa bræður mínar og systur undan andlegu oki trúarbragðanna sem hlekkir huga mannsins og gerir lítið úr honum. Losa þau undan þeim hlekkjum sem vel skipulögð og rík félög festu þau í æsku. Félög sem rekin eru af því fólki sem var hlekkjað í æsku.

Ég vorkenni trúuðu fólki sem lifir í blekkingu. 

Skilurðu?

[Ein/n sammála! (IP-tala skráð) 1.3.2007 kl. 00:02]

Alfa námskeiðið er hugsað sem námskeið en ekki bók til þess að grípa í og lesa sjálfur! Ég er því sammála um að henda bókinni:) Borgarbókasafnið ætti í raun að henda bókinni og ef þú hefur tíma endilega gerðu það!

[Hjalti Rúnar Ómarsson, 7.3.2007 kl. 23:30]

Ein/n sammála

Ég skil ekki alveg hvernig þetta tengist gagnrýninni minni. Það er alveg hægt að gagnrýna bókina eina og sér.

Ef kennslubók í landafræði héldi því fram að Ísland væri hluti af Afríku, þá væri ekki hægt að svara því með því að segja að það væri allt í lagi vegna þess að þú ættir líka að hlusta á kennara.

Ég er sammála því að þessi bók á heima í ruslinu.

[Hjalti Rúnar Ómarsson, 2.8.2007 kl. 13:03]

Nei.
Nei.
Nei.