orð GUÐS til þín

Ef bróðir þinn, sonur móður þinnar, eða sonur þinn eða dóttir þín eða konan í faðmi þínum eða vinur þinn, sem þú elskar eins og lífið í brjósti þínu, ginnir þig einslega og segir: ,,Vér skulum fara og dýrka aðra guði,`` þá er hvorki þú né feður þínir hafa þekkt, af guðum þeirra þjóða, sem kringum yður eru, hvort heldur þær eru nálægar þér eða fjarlægar þér, frá einu heimsskauti til annars, þá skalt þú eigi gjöra að vilja hans og eigi hlýða á hann, og þú skalt ekki líta hann vægðarauga og þú skalt ekki þyrma honum né hylma yfir með honum, heldur skalt þú drepa hann, þín hönd skal fyrst á lofti vera gegn honum til þess að deyða hann, og því næst hönd alls lýðsins. Þú skalt lemja hann grjóti til bana, af því að hann leitaðist við að tæla þig frá Drottni Guði þínum, sem leiddi þig út af Egyptalandi, út úr þrælahúsinu. (Fimmta bók Móse 13:6-10)

Og svo smá ritskýring frá þjóðkirkjuprestinum Erni Bárði:

Ég minnst þess þegar ég var við nám í guðfræði hvað það kom mér og öðrum nemendum á óvart hve mikil áhersla er lögð á mannréttindi í Gamla testamentinu.#

Að kitla eyrun

Síðastliðinn sunnudag þurftu prestar þjóðkirkjunnar að predika um þessi vers:

Þá leit Jesús í kring og sagði við lærisveina sína: ,,Hve torvelt verður þeim, sem auðinn hafa, að ganga inn í Guðs ríki.``Lærisveinunum brá mjög við orð Jesú, en hann sagði aftur við þá: ,,Börn, hve torvelt er að komast inn í Guðs ríki. Auðveldara er úlfalda að fara gegnum nálarauga en auðmanni að komast inn í Guðs ríki.`` En þeir urðu steini lostnir og sögðu sín á milli: ,,Hver getur þá orðið hólpinn?`` Jesús horfði á þá og sagði: ,,Fyrir mönnum eru engin ráð til þessa, en fyrir Guði. Guð megnar allt.`` (Mk 10:23-27)

Á bloggsíðu sinni segir þjóðkirkjupresturinn  Baldur Kristjánsson að það "segi sig sjálft" að feitletruðu ummæli Jesú vísi til þess að það hafi verið til hlið í Jerúsalem sem hét Nálaraugað 
sem varsvo þröngt að kameldýr komst ekki í gegnum það með byrgðar á bakinu. 
Ég spurði hann tvisvar að því hvers vegna hann hélt að þetta væri raunin, í bæði skiptin 
var svarið að það segði sig bara sjálft.

Ég ákvað að kíkja á hvað fræðimenn höfðu um þetta að segja, greinar í fræðiritum á netinu höfnuðu þessu án nokkurra útskýringa, þannig að ég kíkti á ritskýringarrit á Landsbókasafninu. Ég byrjaði á Word Biblical Commentary um viðeigandi hluta og þar stóð:

"When Jesus says trumalias rafidos, "eye of a needle," he means just that. He is not talking about a small gate somewhere in the walls of Jerusalem through which camels may have passed with great difficulty. The so-called Needle Gate that the locals show to gullible pilagrims to the Holy Land cannot be dated any earlier than the Middle ages (usually to Theophylact)"

Síðan var bent á svipuð dæmi úr ritum gyðinga. Önnur ritskýringarrit tóku undir þetta og maður þarf ekki nema að lesa textann til þess að sjá að þessi miðaldaskýring (þessi Theophylact er frá 11. öld) er út í hött.

Ef Jesús var bara að segja að það væri jafn erfitt fyrir auðmann að komast til himnaríkis og fyrir úlfalda að komast inn um hlið sem hann rétt svo passaði í, þá væru viðbrögð lærisveinanna óskiljanleg: "En þeir urðu steini lostnir og sögðu sín á milli: ,,Hver getur þá orðið hólpinn?"

Nei, í guðspjallinu er Jesús hreinlega ekki bjartsýnn á örlög auðmanna. En að allt öðru máli: Fyrir tveimur árum síðan voru lægstu byrjunarlaun presta 420 þúsund krónur á mánuði.  Sumir 
þeirra eru með miklu hærri laun. Prestagreyin telja nálaraugað greinilega ekki vera of lítið fyrir andlega menn eins og þá, því núna í september var þetta ákveðið á stjórnarfundi Prestafélags Íslands:

Helstu áherslur fyrir kjararáð eru eftirfarandi: Allir prestar hafi sömu grunnlaun. Lögð verði áhersla á hækkun grunnlauna og að fleiri einingar fari inn í grunnlaun þar sem það leiði til hærri lífeyris presta. 

Að drepa börn

Ég held að allt heilbrigt fólk sé sammála því að það sé rangt að drepa börn (mikið af kristnu fólki finnst reyndar ekkert athugavert við að guð þeirra drepi og fyrirskipi morð á börnum í biblíunni). Ef við ímyndum okkur hins vegar að sumt af því sem sumt kristið fólk heldur fram sé satt, þá væri hámark góðmennskunnar að drepa börn.

Gefum okkur að þetta sé satt:

1. Öll börn sem deyja fara sjálfkrafa til himna og lifa þar í alsælu að eilífu.
   
2. Fullorðið fólk sem deyr fer annað hvort til himna (og lifir þar í alsælu að eilífu) eða þá til helvítis og kvelst þar að eilífu.

Ef þetta væri satt, þá er hugsanlegt að barn sem fullorðnast eigi eftir að lenda í helvíti.

Með því að drepa barnið væri maður að koma í veg fyrir að það geti mögulega kvalist að eilífu.

Þannig að ef þetta er satt, þá væri það mjög göfugt af manni að drepa börn.

Hinn andsetni Jesús

Fáir átta sig á því að í byrjun Markúsarguðspjalls virðist Jesús vera andsetinn:

Svo bar við á þeim dögum, að Jesús kom frá Nasaret í Galíleu og var skírður af Jóhannesi í Jórdan. Um leið og hann sté upp úr vatninu, sá hann himnana ljúkast upp og andann stíga niður í sig eins og dúfu. Og rödd kom af himnum: ,,Þú ert minn elskaði sonur, á þér hef ég velþóknun.`` Þá knúði andinn hann út í óbyggðina,... (Mk. 1:9-12)

Í íslensku þýðingunni er sagt að andinn hafi stigið niður 'yfir' Jesú en ekki 'í' hann. 
Í Lúkasar- og Matteusarguðspjalli er notað gríska orðið 'epi' sem þýðir sannarlega yfir. 
En í Markúsarguðspjallistendur hins vegar að andinn hafi farið 'eis' Jesú, inn í Jesú. Ef við skoðum aðra staði í Markúsarguðspjalli þar sem þessi forsetning er notuð í sambandi við anda, þá er augljóst að andinn fer í viðkomandi:

Og þeir [illu andarnir] báðu hann [Jesú] : ,,Send oss í svínin, lát oss fara í þau!`` Hann leyfði þeim það, og fóru þá óhreinu andarnir út og í svínin, og hjörðin, nær tveim þúsundum, ruddist fram af hamrinum í vatnið og drukknaði þar. (Mk. 5:12-13)

Nú sér Jesús, að mannfjöldi þyrpist að. Þá hastar hann á óhreina andann og segir: ,,Þú dumbi, daufi andi, ég býð þér, far út af honum, og kom aldrei framar í hann.``(Mk. 9:25)

Miðað við þessi dæmi, þá er líklegt að höfundur Markúsarguðspjalls hafi ímyndað sér að við 
skírnina hafi andi stigið niður af himnum og andsetið Jesú. 

Næsta vers virðist taka allan vafa af þessu, þar 'knýr' andinn Jesú út í óbyggðina. Orðið sem er þýtt 
sem 'knúði' þýðir orðrétt 'að henda (út)' og er meðal annars notað um að reka út illa anda og reka 
fólk í burtu (Mk. 11:15). Andinn sem er nýfarinn inn í Jesús virðist sem sagt taka völdin og rekur Jesú út í óbyggðina.

Þetta væri afskaplega ómerkilegt ef ekki væri fyrir þá staðreynd að þetta passar engan veginn við trúarhugmyndir kristinna manna. Samkvæmt þeim þá hefur Jesús alltaf verið guð og hluti af þrenningunni. Það að einn hluti þrenningarinnar hafi andsetið annan hluta þrenningarinnar og stjórnað honum er auðvitað afar undarlegt.

Hvernig frelsast maður kona?

Það er algengt að kristnir menn boði þá villukenningu að konur öðlist frelsi með því að trúa á Jesú Krist. Ég verð alltaf jafn hissa á því hve mikið af sannkristnu fólki fellur fyrir þessar óbiblíulegu kenningu. Já, hún er klárlega óbiblíuleg:

En hún [konan] mun hólpin verða, sakir barnburðarins, ef hún stendur stöðug í trú, kærleika og helgun, samfara hóglæti. (1. Tím. 2:15)

Hún mun hólpni verða, sakir barnburðarins. Trúin er auðvitað líka nauðsynleg, en það er meiri áhersla lögð á barnburðinn.  

orð GUÐS til þín

Jesús sagði: "En þessa óvini mína, sem vildu ekki að ég yrði konungur yfir sér, færið þá hingað og höggvið þá frammi fyrir mér."

Lúk 19:27

Falsspámaðurinn

Jesús spáði:

"Mannssonurinn mun koma í dýrð föður síns með englum sínum, og þá mun hann gjalda sérhverjum eftir breytni hans. Sannlega segi ég yður: Nokkrir þeirra, sem hér standa, munu eigi dauða bíða, fyrr en þeir sjá Mannssoninn koma í ríki sínu." (Mt 16:27-28)

Ég held að það sé óumdeilanlegt að heimurinn hafi ekki endað á lífstíð þeirra manna sem hlustuðu á þessi orð Jesú. Þannig að þessi spádómur Jesú rættist augljóslega ekki. Jesús var falsspámaður.

Nema auðvitað að Jesús hafi ekki sagt þetta. Ég get alveg fallist á að guðspjöllin séu ekki áreiðanleg.

orð GUÐS til þín

Jesús: "Eins og illgresinu er safnað og brennt í eldi, þannig verður við endi veraldar. Mannssonurinn mun senda engla sína, og þeir munu safna úr ríki hans öllum, sem hneykslunum valda og ranglæti fremja, og kasta þeim í eldsofninn. Þar verður grátur og gnístran tanna."

                                               Mt. 13:40-42

Hin einu sönnu tíu boðorð.

Ég hef tekið eftir því að kristnir moggabloggarar virðast ekki kunna boðorðin tíu. Hérna eru þau boðorð sem biblían kallar boðorðin tíu:

1.  Þú skalt eigi tilbiðja neinn annan guð, því að Drottinn nefnist vandlætari. Vandlátur Guð er hann.Varast að gjöra nokkurn sáttmála við íbúa landsins, því að þeir munu taka fram hjá með guðum sínum og þeir munu færa fórnir guðum sínum, og þér mun verða boðið og þú munt eta af fórnum þeirra. Og þú munt taka dætur þeirra handa sonum þínum, og dætur þeirra munu taka fram hjá með guðum sínum og tæla syni þína til að taka fram hjá með guðum þeirra.
2. Þú skalt eigi gjöra þér steypta guði.
3. Þú skalt halda hátíð hinna ósýrðu brauða. Sjö daga skaltu eta ósýrð brauð, eins og ég hefi boðið þér, á ákveðnum tíma í abíb-mánuði, því að í abíb-mánuði fórst þú út af Egyptalandi. Allt það, sem opnar móðurlíf, er mitt, sömuleiðis allur fénaður þinn, sem karlkyns er, frumburðir nauta og sauða. En frumburði undan ösnum skaltu leysa með lambi. Leysir þú ekki, skaltu brjóta þá úr hálsliðum. Alla frumburði sona þinna skaltu leysa, og enginn skal tómhentur koma fyrir auglit mitt.
4. Sex daga skaltu vinna, en hvílast hinn sjöunda dag, þá skaltu hvílast, hvort heldur er plægingartími eða uppskeru.
5. Þú skalt halda viknahátíðina, hátíð frumgróða hveitiuppskerunnar, og uppskeruhátíðina við árslokin.
6. Þrem sinnum á ári skal allt þitt karlkyn birtast frammi fyrir Drottni Guði, Guði Ísraels. Því að ég mun reka heiðingjana burt frá þér og færa út landamerki þín, og enginn skal áseilast land þitt, þegar þú fer upp til að birtast frammi fyrir Drottni Guði þínum þrem sinnum á ári.
7. Þú skalt ekki fram bera blóð fórnar minnar með sýrðu brauði.
8. Páskahátíðarfórnin má ekki liggja til morguns.
9. Hið fyrsta, frumgróða jarðar þinnar, skaltu færa til húss Drottins Guðs þíns.
10. Þú skalt ekki sjóða kið í mjólk móður sinnar.

Þetta eru boðorðin tíu sem eru talin upp í 34. kafla annarrar Mósebókar. 
Og það vill svo til að þessi boðorð eru kölluð "tíu boðorðin" (vers 28)

Sumir trúmenn eiga erfitt með að sætta sig við það að þetat séu tíu boðorðin, en kaflinn er afar skýr hvað það varðar:

Guð segir við Móse að taka með sér tvær töflur upp á fjallið, Móses hlýðir því auðvitað. Guð telur upp þessi tíu boðorð (vers 14-26) og segir við Móses: "Skrifa þú upp þessi orð, því að samkvæmt þessum orðum hefi ég gjört sáttmála við þig og við Ísrael." (vers 27). Og hvað gerir Móses: "Hann skrifaði á töflurnar orð sáttmálans, tíu boðorðin." (vers 28)

Mér finnst hræðilegt að krakkar læri ekki um þennan djúpa siðaboðskap í skólanum. 
Hvernig getur fólk ætlast til þess að unglingar leiðist ekki út í eiturlyfjaneyslu þegar þeir læra ekkert
um að halda hátíð hinna ósýrðu brauða í Abíb-mánuði?
 

Myndræn uppsetning mótsagnar

Í umræðunni við greinina Trúvarnarmaðurinn Guðsteinn kom Linda honum til bjargar. Að sögn Guðsteins "þýðir ekki að þræta um ritninguna við þessa vantrúar menn" því það "endar bara með málþófi og engri niðurstöðu"#. Ég er ekki eins vantrúaður og Guðsteinn á gildi rökræðna og ætla því að reyna að útskýra fyrir Lindu hvers vegna það er mótsögn á milli Jh. 21 og Mt. 28.

Til þess að hún átti sig betur á mótsögninni ætla ég að segja frá hvernig atburðarrásin ætti að vera ef bæði guðspjöllin (Matteusar- og Jóhannesarguðspjall) greina rétt frá. Til gamans læt ég fylgja með vísun á myndir af sömu atburðunum í Legó-biblíunni:

1. María Magdalena kemur að gröfinni (Jh 20:1)
2. Engill kemur niður af himnum og veltir steininum frá gröfinni (Mt 28:2), verðirnir verða "sem öreindir" af hræðslu (Mt 28:4) og engillinn segir við Maríu Magdalenu: "[Jesús]
er ekki hér. Hann er upp risinn, eins og hann sagði. Komið og sjáið staðinn, þar sem hann lá. Farið í skyndi og segið lærisveinum hans: "Hann er upp risinn frá dauðum, sjá hann fer á undan yður til Galíleu. Þar munuð þér sjá hann."" (Mt 28:6-7)
3. Á leiðinni til lærisveinanna hittir María Magdalena Jesús sem segir við hana: "Óttist ekki, farið og segið bræðrum mínum að halda til Galíleu. Þar munu þeir sjá mig." (Mt 28:9). María fellur líka fram fyrir fætur hans og faðmaði fætur hans.
4. María Magdalena kemur til lærisvenianna og segir þeim: "Þeir hafa tekið Drottin úr gröfinni, og vér vitum ekki, hvar þeir hafa lagt hann." (Jh 20:2)

Ef annað hvort atburður 2 eða 3 hefðu átt sér stað er ljóst að María Magdalena hefði ekki sagt það sem hún segir í 4. Í 2 og 3 er lýst atburðum sem ættu að sannfæra Maríu um að Jesús sé ekki dáinn, en í 4. heldur hún að hann sé enn þá dáinn.