Siðferðisvandræði trúaðs fólks

Mér finnst ótrúlegt hvað trúað fólk á stundum erfitt með að fordæma hluti sem eru augljóslega slæmir.

Trúvarnarmennirnir Guðsteinn og Mofi eiga til dæmis afar erfitt með að fordæma það að útrýma þjóðum vegna einhvers sem forfeður þjóðarinnar gerðu #. Þeir ættu til dæmis í erfiðleikum með að svara því hvort það væri rétt að útrýma öllum Dönum (þar með talið nýfæddum börnum!) út af Kópavogsfundinum.

Nýjasta dæmið af þessum erfiðleikum trúaðs fólks er frá Guðrúni Vöku, en hún veit ekki hvort að vísindamaður væri slæmur ef hann byggi til banvænan vírus og smitaði fólk með honum.

Ég hef hingað til ekki fengið svör frá ríkiskirkjuprestum um þessi málefni, en þeir trúa á guð Gamla testamentisins (sá sem fyrirskipaði og framkvæmdi þjóðarmorð) og þeir trúa því að guðinn þeirra hafi skapað sýkla [1].

Ég á afar erfitt með að taka það fólk alvarlega sem getur ekki fordæmt hluti eins og sýklahernað og þjóðarmorð vegna þess að þá þyrfti það að fordæma guðinn sinn.

[1] Ríkiskirkjupresturinn Skúli Ólafsson segir: "Guð skapaði sýkla og ég hef ekki hugmynd um hvers vegna hann gerði það."

Athugasemdir

[Mofi, 18.5.2009 kl. 13:00]

Ég á erfitt að fordæma ákvarðanir Guðs því að ég trúi að Guð er kærleiksríkur og hefur góðar ástæður fyrir sínum ákvörðunum. Að Guð viti betur en ég, hvað er rétt og hvað er kærleiksríkt.

Varðandi sýkla þá eru langflestir þeirra annað hvort skaðlausir eða gagnlegir. Aðeins nokkrir sem eru skaðlegir og þá miklu frekar dæmi um eitthvað sem hefur bilað í náttúrunni vegna syndafallsins en að þeir hafi verið skapaðir þannig.

Kv,
Mofi

[Hjalti Rúnar Ómarsson, 18.5.2009 kl. 18:31]

Að hugsa sér, Mofi getur ekki fordæmt þjóðarmorð. Af hverju ætti nokkur maður að taka mark á þér í umræðum um siðferði þegar þú getur ekki fordæmt þjóðarmorð?

Aðeins nokkrir sem eru skaðlegir og þá miklu frekar dæmi um eitthvað sem hefur bilað í náttúrunni vegna syndafallsins en að þeir hafi verið skapaðir þannig.

Þessi rök virka náttúrulega bara ef þú neitar augljósum staðreyndum (t.d. því að maðurinn er miklu yngri en lífverur sem eru skaðlegar okkur).

En mér finnst ótrúlegt hvernig hlutir eiga að "bila" á þann hátt að þeir virðast vera sérhannaðir til þess að sigrast á ónæmiskerfinu okkar og drepa okkur. Virðist t.d. hluturinn vinstra megin á þessari mynd vera "bilun"?

[Mofi, 19.5.2009 kl. 14:46]

Hjalti, ég get ekki litið á það sem morð ef Guð tekur líf frá einhverjum því Guð var sá sem gaf það til að byrja með og Honum ber engin skylda að halda einum eða neinum á lífi.

Varðandi augljósar staðreyndir eins og maðurinn er miklu yngri þá finnst mér ekkert augljóst við það; ég held að mannkynið er aðeins nokkrum dögum yngri en sumar af þessum lífverum :)

Varðandi bilunina og myndina. Bilun að því leiti að viðkomandi hlutur átti að vera annars staðar í öðru samhengi; hvernig það gerðist er vandamál sem þyrfti að finna út úr í sérhverju tilfelli.  En myndin óneitanlega sýnir augljósa hönnun, takk fyrir að benda á það :)

Hvernig er það; ertu að vinna í sundlaug Kópavogs?  Ég er oft að æfa þar og sá þar einhvern sem mér fannst geta verið þú. 

[Hjalti Rúnar Ómarsson, 21.5.2009 kl. 22:34]

Hjalti, ég get ekki litið á það sem morð ef Guð tekur líf frá einhverjum því Guð var sá sem gaf það til að byrja með og Honum ber engin skylda að halda einum eða neinum á lífi.

Mofi, orðið "þjóðardráp" er að ég held bara ekki notað, því að þjóðarmorð eru bara almennt fordæmd. Ef þú vilt tala um "þjóðardráp" þá máttu alveg gera það.

Varðandi bilunina, þá er erfitt að ímynda sér hvernig eitthvað gæti bilað á þann hátt að það verði mjög hárþróuð og fullkomin vél til þess að drepa fólk.

Hvernig er það; ertu að vinna í sundlaug Kópavogs?  Ég er oft að æfa þar og sá þar einhvern sem mér fannst geta verið þú. 

Sá er maðurinn.

[Mofi, 22.5.2009 kl. 11:41]

Varðandi bilunina þá var ég að tala um að eitthvað sem virðist vera hannað með ákveðinn tilgang en er á röngum stað og á þessum nýja stað er viðkomandi hlutur að gera skaða.

Ég verð þá að heilsa upp á þig þegar ég sé þig næst :)

[Hjalti Rúnar Ómarsson, 22.5.2009 kl. 11:44]

Hvaða tilgang hefur til dæmis Malaríu-sníkjudýrið? Hvaða tilgangi þjóna vírusar?