Vondu gyðingarnir sem drápu Jesú

Prestarnir bara geta ekki hætt að fegra söguna af Jesú, síðast var það ríkiskirkjupresturinn Baldur Kristjánsson sem sagði að aðalboðskapur Jesú hafi verið jafnrétti (en guðspjallaritararnir virðast bara hafa gleymt að minnat á það), á undan honum var Þórhallur að segja að grundvallarboðskapur Jesú var að allir væru guðs börn (þrátt fyrir að í guðspjöllunum segir Jesús einmitt að bara sumir séu guðs börn). Núna eru það ríkiskirkjuprestahjónin Kristín Þórunn Tómasardóttir og Árni Svanur Daníelsson. Þetta hafa þau að segja:

...þegar Jesús sem kenndi um trúna og ástina, var tekinn af lífi, drepinn, fyrir einmitt það.

Eins og ég hef minnst á áður, þá er kristið fólk enn þá með "költ"-hugsunarhátt þegar það kemur að stofnanda trúarbragðanna þeirra. Leiðtoginn var óskeikull. Leiðtoginn var syndlaus. Leiðtoginn lifir að eilífu.

Þessi fullyrðing Kristínar og Árna er af þessu meiði, þau láta eins og leiðtoginn þeirra hafi verið tekinn af lífi fyrir að "kenna um trúna og ástina". Það er hægt að skilja þessa fullyrðingu á tvo vegu, annars vegar að þau séu að fullyrða um hver var raunveruleg ástæða þess að Jesú var tekinnn af lífi, og hins vegar að þau séu að segja að þetta sé bara það sem guðspjöllin segja að hafi verið ástæðan.

Skoðum fyrri möguleikann: Árni og Kristín eru að segja að Jesús var í raun og veru tekinn af lífi fyrir að "kenna um trúna og ástina".

Ef þau eru að halda þessu fram, þá finnst mér þetta ótrúlegur hugsunarháttur. Þá verða þau að ímynda sér einhvern veginn að gyðingarnir of Rómverjarnir hafi verið einhvers konar bíómyndaillmenni. Gyðingarnir hötuðu Jesú og vildu taka hann af lífi af því að hann "kenndi um trúna og ástina". Enda hata gyðingar auðvitað að heyra um "trúna og ástina"! Frekar brjálað að mínu mati.

Og hvernig geta þau sagt að boðskapur Jesú hafi verið fullur af ást? Hafa prestarnir ekki lesið allt tal Jesú um að heimsendir væri í nánd og þá myndi guð henda fólki í helvíti? Er það fallegt tal um "trúna og ástina"?

Og voru ekki einhverjar aðrar líklegri ástæður? Hvað með þá sögu í guðspjöllunum að Jesús hafi staðið fyrir upphlaupi í musterinu? Er ekki líklegra að Rómverjarnir hafi drepið hann fyrir að hvetja til óeirða? Ef sú saga er ekki alger skáldskapur, þá er miklu líklegra að Jesús hafi verið tekinn af lífi fyrir það, en ekki fyrir að kenna um "ást". Það hljómar bara ekki eins vel að Jesús hafi verið tekinn af lífi fyrir "brot gegn valdstjórninni" eins og að hann hafi verið tekinn af lífi fyrir að "kenna um trúna og ástina"

Skoðum hinn möguleikann: Árni og Kristin eru ekki að fullyrða neitt um hvað gerðist í raun og veru, heldur bara það hvað guðspjöllin segja að ástæðan fyrir aftöku Jesú var.

Í Jóhannesargupspjalli er sagt að "gyðingar" (samkvæmt Jóhannesarguðspjalli eru gyðingar illir) hafi viljað taka Jesú af lífi fyrir að brjóta gegn helgi hvíldardagsins og að predika að hann væri guðlegur (Jóh 5.16-18, 8.58-59 og Jóh 10.31-33), það væri kannski hægt að flokka það sem að kenna um "trúna og ástina". Þar kemur einnig fram að gyðingarnir ákváðu að taka hann af lífi því að ef hann fengi að kenna áfram myndi fólk byrja að trúa á hann og það myndi enda með ósköpum (innrás Rómverja). Passar ekki beint við að "kenna um trúna og ástina".

Í Markúsarguðspjalli er áhugaverð saga, þar ákveða vondu gyðingarnir að drepa Jesú af því að hann talar illa um þá í dæmisögu (Mk 12.12). Í dæmisögunni talar Jesú um að gyðingar hafi drepið spámennina og þeir muni líka drepa Jesú, og fyrir það muni guð drepa þá (og þá er verið að vísa til árás Rómverja á gyðinga ~70 e.o.t.). Það er kannski hægt að flokka það sem að kenna um "trú", en ég veit ekki hvað hefnd guðs á gyðingum fyrir að drepa Jesú hefur með "ástarkennslu" að gera.

Þannig að, þá má ef til vill halda því fram að Jesús hafi verið drepinn fyrir trúarkenningar sínar samkvæmt guðspjöllunum, en ástæðurnar sem gefnar eru þar eru frekar vafasamar (sérstaklega þar sem þær virðast bera með sér að hafa verið samdar eftir árið 70). En að halda því fram að hann hafi verið drepinn fyrir að kenna um "ástina" samkvæmt guðspöllunum er út í hött, þar sem að það sem hann var drepinn fyrir samkvæmt guðspjöllunum hefur ekkert með "ást" að gera.

Með því að tala um að Jesús hafi verið drepinn fyrir að kenna um "ástina", þá eru ríkiskirkjuprestarnir auðvitað að fegra Jesú. En um leið og þau fegra Jesú, þá gleyma þau sér í áróðrinum og gera gyðinga að illmennum sem þola ekki þegar fólk kennir um ást. Frekar sorglegt.

Athugasemdir

[Aðalbjörn Steingrímsson (IP-tala skráð) 26.3.2011 kl. 19:44]

Trúarbrögð almennt,  eru sorgleg fyrirbrigði.

[Jón Valur Jensson, 27.3.2011 kl. 03:33]

Líberalista-prestar eins og séra Baldur Kristjánsson (þótt honum sé ekki alls varnað) eru ekki dæmigerðir um kristna trú og kenningu. Útvötnuð er ennfremur guðfræði þeirra Kristínar og Árna, eins og fram hefur komið í fleiri málum.

Þú ert að slást við vindmyllur, Hjalti minn. Líberalismi þessara síðustu aldaskipta er engu skárri en aldamótaguðfræðin í byrjun 20. aldar.

Annars nenni ég ekki að renna augum gegnum framhaldið af þessum pistli þínum; þú virðist aftur á móti harla harðsvíraður í því að halda uppi árásum á kristindóm, bæði alvöru og gervi. Hvenær hættirðu að streitast gegn broddunum? – því að greindur ertu og áfram leitandi, um það efast ég ekki, og vertu nú blessaður, ég sendi á þig eina bæn.

[Vilhjálmur Örn Vilhjálmsson, 27.3.2011 kl. 06:13]

Ef menn læra af mistökum guðspjallanna, eða Kóransins, þá hafa menn kannski lært eitthvað af þeim boðskap kærleiks sem finnst í Gyðingdómi. Sá kærleikur byggir meðal annars á að menn þurfa ekki að abbast með sannleika sinn upp á aðra, eða særa aðra með ófullkomleika skoðana þeirra.

Þú hefur lítið lært Hjalti Rúnar Ómarsson, frekar en þeir sem þú gagnrýnir svo hart.

[Helgi Armannsson (IP-tala skráð) 27.3.2011 kl. 09:38]

http://www.youtube.com/watch?v=gPOfurmrjxo&NR=1 

kvad hefur eiginlega komid firir tig Vilhjalmur . tu hefur litid laert um kaerleika er eg hraedur um . mer finst tetta video her ad ovan solitid snidugt en er samt ekki sammala ollu sem han segir

[Hjalti Rúnar Ómarsson, 27.3.2011 kl. 11:00]

Jón Valur, ég veit nú ekki af hverju þú segir að ég sé að berjast við vindmyllur. Ég er nokkuð viss um að "líberalista-prestar" séu til í raun og veru.

Vilhjálmur, hættu að abbast með sannleika þinn upp á mig og særa mig með ófullkomleika skoðana þinna.

[Jón Valur Jensson, 27.3.2011 kl. 13:47]

Það er rétt, Hjalti, þeir eru til, en þessi kenning þeirra er sem vindur og hjóm.