Lailaha

13.10.2010 | 09:21

Gegn þrenningunni

Í síðustu færslu fjallaði ég um skortinn á textum í biblíunni sem kenna þrenningarkenninguna, og þá staðreynd að ein fölsun sýnir fram á að það hefði verið auðvelt fyrir guð að kenna hana. En núna ætla ég að benda á vers sem að virðast benda til þess að hinir fyrstu kristnu menn hafi ekki trúað á þrenningarkenninguna, að hún sé beinlínist andstæð biblíunni. Páll postuli skrifaði þetta:

En hvað varðar neyslu kjöts, sem fórnað hefur verið skurðgoðum, þá vitum vér, að skurðgoð er ekkert í heiminum og að enginn er guð nema einn. Því að enda þótt til séu svo nefndir guðir, hvort heldur er á himni eða á jörðu, enda eru margir guðir og margir herrar, þá höfum vér ekki nema einn guð, föðurinn, sem allir hlutir eru frá og líf vort stefnir til, og einn drottin, Jesú Krist, sem allir hlutir eru til orðnir fyrir og vér fyrir hann. ( 1Kor 8.4-6)

Vandamálið fyrir þrenningarsinna er að þarna segir Páll hreint út að faðirinn einn er guð. Samkvæmt þrenningarkenningunni er Jesús líka guð og heilagur andi líka guð. Jesús er settur í annan flokk, hann er ekki guð, enda er bara faðirinn guð.

Það er ekki undarlegt að mikið af fólki sem skoðar biblíuna vandlega (t.d. stofnandi Votta Jehóva) komist að þeirri niðurstöðu að þrenningin sé ekki í samræmi við biblíuna. Það sem er hins vegar undarlegt, er að flestir trúmenn (þar með talið líklega allir prestar ríkiskirkjunnar) samþykki þessa kenningu.

Flokkur: Trúmál og siðferði | Facebook

Athugasemdir

Mikið hefur hann vafið liðinu um fingur sér, þessi Jesús Kristur. Hann hlýtur að hafa verið ansi geðugur og sannfærandi náungi.

Kristinn Theódórsson, 13.10.2010 kl. 15:38

Newton komst að sömu niðurstöðu

Sveinn Þórhallsson, 13.10.2010 kl. 15:59

Hér ferðu enn og aftur með villur Hjalti, hér er Páll að ítreka að það sé bara einn alvöru Guð og það er Guð faðir okkar. En Guð er ekki svo lítill að þú eða ég eða einhver annar hér á jörð geti skilið hann til fullnustu. Hann er þríeinn Guð. Faðirinn, Sonurinn og Heilagur andi.

Þú talar um hér í fyrri þræði þínum að þú getir bara fundið "tvenndar" kenningunni stað og villt þar með taka Heilagan anda í burtu úr myndinni en þú verður að athuga að samkvæmt hugmyndum kristinna manna þá steig Jesús upp til himna og varð himnesk vera (Heilagur andi). Þú getur fundið þá staði í Biblíunni sem lýsa því að Heilagur andi sé staðgengill Jesú eftir upprisuna. Heilagur andi er hjálpari, huggari og læknari ekki ósvipað því sem Jesús var í sínu jarðneska lífi. Í þeim skilningi er um þrenningu að ræða, Guð faðirinn á himnum, Jesús sonurinn á himnum og Heilagur andi sem er staðgengill Jesú hér á jörðinni.

Við erum öll andans verur og Heilagur andi er andi Drottins. Það væri hægt að skrifa heila ritgerð um þetta málefni með biblíutilvitnunum. Ég læt hér nægja texta af vefnum www.gotquestion.org :

Spurning: Hvað kennir Biblían um Heilaga þrenningu?

Svar: Það erfiðasta við hugmyndina um Heilaga þrenningu er, að engin leið er að skýra hana. Heilög þrenning er hugmynd sem mannlegum huga er um megn að skilja, hvað þá útskýra. Guð er óendanlega meiri og stærri en við erum. Þess vegna ættum við ekki að gera okkur vonir um að skilja Hann. Biblían kennir okkur að Faðirinn sé Guð, Jesús sé Guð og Heilagur andi sé Guð. Biblían kennir okkur líka, að aðeins sé einn Guð. Þó við getum skilið ákveðna þætti sambandsins milli persóna Heilagrar þrenningar, þá er það þegar allt kemur til alls óskiljanlegt mennskum huga. Það merkir samt ekki, að það sé ekki sannleikanum samkvæmt eða ekki byggt á boðskap Biblíunnar.

Við skulum hafa í huga, þegar við fjöllum um þetta efni, að orðið Þrenning kemur ekki fyrir í Biblíunni. Þetta hugtak er notað til að reyna að lýsa fyrirbærinu þríeinn Guð, þeirri staðreynd að Guð samanstendur af 3 eilífum og samlífum persónum. Höfum í huga að ekki er ýjað að þremur guðum. Heilög þrenning er einn Guð sem samanstendur af þremur persónum. Það er ekkert rangt við að nota orðið Þrenning, þó það komi ekki fyrir í Biblíunni. Auðveldara er að segja Þrenning heldur en 3 eilífar og samlífar persónur sem mynda 1 Guð. Ef þetta veldur vandræðum, þá skuluð þið hugleiða eftirfarandi: orðið afi kemur ekki fyrir í Biblíunni. Samt vitum við að í Biblíunni voru afar. Abraham var afi Jakobs. Svo við skulum ekki láta orðið Þrenning trufla okkur. Það sem öllu máli skiptir er að hugtakið sem orðið Þrenning táknar er fyrir hendi í Ritningunni. Að þessu sögðu látum við vers úr Biblíunni tala sínu máli.

1) Drottinn er vor Guð; hann einn er Drottinn! 5Mós 6:4; 1 Kor 84; Gal 3:20; 1Tím 2:5.

2) Heilög þrenning samanstendur af þremur persónum: 1Mós 1:1; 1:26; 3:22; 11:7; Jes 6:8; 48:16; 61:11; Matt 3:16-17; 28:19; 2 Kor 13:14. Varðandi texta Gamla testamentis er þekking á hebresku gagnlegi 1Mós 1:1 er notuð fleirtala nafnorðsins Elohim Í 1Mós 1:26; 3:22; 11;17 og Jes 6:8 er notuð fleirtala fornafnsins okkur. Að Elohim og okkur vísi til fleiri en tveggja er hafið yfir allan vafa. Í íslensku eru einungis tvær myndir, eintala og fleirtala. Í hebresku eru þrjár myndir: eintala, tvítala og fleirtala. Tvítala vísar að sjálfsögðu til tveggja. Í hebresku er tvítölumyndin notuð um hluti sem koma í pörum: augu, eyru, hendur. Orðið Elohim og fornafnið okkur eru fleirtölumyndir, merkja fleiri en tvo eða tvennt  hljóta því að vísa til þriggja eða fleiri (Föður, Sonar og Heilags anda).

Í Jesaja 48:16 og 61:1 er Sonur að tala og vísar til Föðurins og Heilags anda. Berið saman Jesaja 61:1 og Lúkas 4:14-19 til aða ganga úr skugga um, að Sonurinn er að tala. Matteus 3:16-17 lýsir skírn Jesú. Þar sést Guð Helgur andi koma yfir Guð Soninn, meðan Guð Faðir lýsir yfir velþóknun sinni. Matteus 28:19 og Seinna Korintubréf 13:14 eru dæmi um þrjár aðskildar persónur Þrenningarinnar.

3) Persónur Þrenningarinnar eru greindar hver frá annarri víða í Ritningunni. Í Gamla testamenti er gerður greinarmunur á DROTTNI og Drottni (1M 19:24; Hós 1:4). DROTTINN á Son (Slm 2: 7, 12, Ok 30:2-4). Andi er greindur frá DROTTNI (4Mós 27:18) og frá Guði (Slm 51:10-12). Guð Sonurinn er greindur frá Guði Föðurnum (Slm 45:6-7; Heb 1:8-9). Í Nýja testamenti talar Jesús í Jóhannesarguðspjalli 14:16-17 um að biðja Föðurinn að senda annan hjálpara, Heilagan anda. Þetta sýnir að Jesús taldi sig hvorki vera Faðir né Heilagur andi. Höfum líka í huga öll þau skipti í guðspjöllunum þegar Jesús talaði við Föðurinn. Var hann að tala við sjálfan sig? Nei. Hann var að tala við aðra persónu Þrenningarinnar  Föðurinn.

4) Sérhver meðlimur Þrenningarinnar er Guð: Faðirinn er Guð (Jóh 6:27; Róm 1:7; 1 Pét 1:2). Sonurinn er Guð (Jóh 1:1,14; Róm 9:5; Kól 2:9; Heb 1:8, 1 Jóh 5:20). Heilagur andi er Guð (P 5:3-4; 1 Kor 3:6). Sá sem dvelst innra með trúuðum er Heilagur andi (Róm 8:9; Jóh 14:16-17; P 2:1-4).

5) Undirgefni innan Þrenningarinnar: Ritningin sýnir að Heilagur andi er undirgefinn Föður og Syni, og Sonurinn undirgefinn Föðurnum. Þetta eru innri tengsl og afneita ekki guðdómi neinnar persónu Þrenningarinnar. Þetta er einfaldlega svið sem takmarkaðir hugir okkar fá ekki skilið varðandi takmarkalausan Guðdóminn. Varðandi Soninn sjá: Lúk 22:42; Jóh 5:36; Jóh 20:21; 1Jóh 4:14. Varðandi Heilagan anda sjá: Jóh 14:16; 14:26; 15:26; 16.7, og einkanlega Jóh 16:13-14.

6) Hlutverk einstakra meðlima Þrenningarinnar: Faðirinn er endanleg orsök og uppspretta 1) alheimsins (1Kor 8:6, Jóh 1:3; Kól 1:16-17), 2) guðlegrar opinberunar (Opb 1:1); 3) hjálpræðis (Jóh 3:16-17), og mannlegra athafna Jesú (Jóh 5:17; 14:10). Faðirinn á frumkvæði að öllu ofantöldu.

Sonurinn er útsendarinn sem leysir af hendi eftirfarandi verkefni Föðurins: 1) sköpun og viðhald alheimsins (1Kor 8:6; Kól 1:16-17); 2) guðlega opinberun (Jóh 1:1, Matt 11:27; Jóh 16:12-15; Opb 1:1); og 3) endurlausn mannkyns (2Kor 5:19; Matt 1;21; Jóh 4;42). Faðirinn vinnur öll þessi verk fyrir mátt Heilags anda.

Engin af alþýðlegum hugmyndum um Heilaga þrenningu nær máli. Eggið (eða eplið) nægir ekki til samanburðar, þar eð skurnin, hvítan og rauðan eru hlutar af egginu, en ekki eggið sjálft. Faðirinn, Sonurinn og Heilagur andi eru ekki hlutar Guðs, því hver og einn þeirra er Guð. Líkingin við vatnið er örlítið nær lagi, en nægir samt ekki til að gera rétta grein fyrir Þrenningunni. Vökvi, gufa og ís eru myndir vatns. Faðirinn, Sonurinn og Heilagur andi eru ekki myndir Guðs, heldur er hver þeirra Guð. Þess vegna eru þessar skýringarmyndir ekki nákvæmar, þó þær kunni að gefa okkur hugmynd um Þrenninguna. Í stað þess að einblína á Heilaga þrenningu er ráð að einbeita sér að mikilleik Guðs og eðli hans, sem er ómælanlega æðra eðli okkar. Hvílíkt djúp ríkdóms, speki og þekkingar Guðs! Hversu órannsakandi dómar hans og órekjandi vegir hans! Hver hefur þekkt huga Drottins? Eða hver hefur verið ráðgjafi hans? (Róm 11:33-34).

Ég hvet þig til þess að lesa þetta yfir Hjalti minn. Þú, í skrifum þínum, ert að gera ráð fyrir því að maður með vitsmuni á borð við þína vitsmuni hafi fundið Guð upp og svo hafi einhverjir aðrir komið og breytt þessari ýmind sem hafi svo valdið ósamræmi. Þetta er náttúrulega bara þvæla, lærifaðir þinn hefur hins vegar kennt þér vel og mun sjálfsagt umbuna þér en sá guðfræðingur er ekki guðfræðingur gæskunnar, eigi skalt þú lengi hjá honum dvelja.

Ég endurtek: Ef Guð væri svo lítill að skilningur á honum myndi rúmast fyrir í mannsvitsmunum þá væri það lítill guð og ekki sá eini rétti.

Athugaðu líka að í gamla testamentinu þá er talað um Guð í fleirtölu, ekki tvítölu eða eintölu. (Hebreska textanum)

Valur Arnarson, 13.10.2010 kl. 20:56

Valur

Hér ferðu enn og aftur með villur Hjalti, hér er Páll að..

Vertu ekki svona hrikalega hrokafullur, Valur. Hjalti er ekkert einn um að skilja þetta svona.

Hugsanlega veður þú í villu og svima, en aðrir trúmenn og/eða Hjalti ekki.

Þín trú og þín túlkun er bara það: þín trú og þín túlkun.

Aðrir hafa jafn mikla sannfæringu, jafn mikla þekkingu, en eru á öndverðu meiði. Þeir eru síðan e.t.v. lítillátari og auðmýkri að auki, og þannig mun nær því að lifa eftir boðskapnum en þú.

Kristinn Theódórsson, 13.10.2010 kl. 21:23

Valur: Hér ferðu enn og aftur með villur Hjalti, hér er Páll að ítreka að það sé bara einn alvöru Guð og það er Guð faðir okkar.

Já, hann segir að faðirinn einn sé guð og hann setur Jesú ekki í þann flokk.

Í staðinn fyrir að koma með eitthvað c-p, viltu ekki reyna að útskýra fyrir okkur almennilega hvers vegna Páll er ekki klárlega að segja þarna að Jesús sé ekki hinn eini sanni guð?

Valur: Þú, í skrifum þínum, ert að gera ráð fyrir því að maður með vitsmuni á borð við þína vitsmuni hafi fundið Guð upp og svo hafi einhverjir aðrir komið og breytt þessari ýmind sem hafi svo valdið ósamræmi.

Ha?

Valur: Þetta er náttúrulega bara þvæla, lærifaðir þinn hefur hins vegar kennt þér vel og mun sjálfsagt umbuna þér en sá guðfræðingur er ekki guðfræðingur gæskunnar, eigi skalt þú lengi hjá honum dvelja.

Lærifaðir minn?

Hjalti Rúnar Ómarsson, 13.10.2010 kl. 21:36