Að byggja á flekaskilum

Í sambandi við þarsíðustu færslu mína um frekar ógeðfelld ummæli þjóðkirkjuprests, þá langar mig að benda á eldri ummæli annars þjóðkirkjuprests. Að þessu sinni er það Sigurður Árni Þórðarson og náttúruhamfarirnar eru í þetta skiptið flóðbylgjan mikla sem drap hátt í 300.000 manns um jólin 2004.Í predikuninni Var Guð í flóðinu? segir hann: 

Hversu góð eru þau stjórnvöld, sem hafa leyft byggingar við strendur rétt við flekaskil? 

Tæknilega séð voru þetta reyndar flekamót, en ég held að það sé hægt að gera ráð fyrir því að presturinn eigi við staði þar sem flekar mætast og ég skil ekki hvers vegna það sé óábyrgara að byggja við strendurnar en ekki inn í löndunum sjálfum, jarðskjálftar drepa ekki bara fólk við strendur. Kíkjum á kort og athugum hvar presturinn vill ekki að stjórnvöld leyfi fólki að búa:

 

Nú sýnist mér að klerkurinn vilji flytja fólk burt frá stórum hluta miðameríku (Mexíkóborg er fræg fyrir að vera á hættulegum stað, bara þar búa næstum því 20 milljónir), vesturströnd Bandaríkjanna, nú auðvitað Súmötru (45 milljónir) eða bara alla Indónesíu (230 milljónir), Japan er auðvitað stórhættulegur staður (125 milljónir), síðan erum við alltaf að frétta af jarðskjálftum í Íran (70 milljónir). Flestir mannskæðustu skjálftar sögunnar hafa átt sér stað í Kína. Jarðskjálftinn í Lissabon í Portúgal 1755 er síðan mjög frægur og ekki má gleyma S-Ítalíu.

En hvers vegna að einblína á jarðskjálfta? Er ekki allt í lagi að leyfa byggð þar sem jarðskjálftar eru hættulegir, en allt í lagi að leyfa byggð þar sem aðrar náttúruhamfarir eru hættulegar? Hvað með flóð? Engin byggð í Bangladesh framar. Hvað með hvirfilbyli? Engin byggð í Karabíska hafinu og austurströnd Bandaríkjanna.

Hvar á allt þetta fólk að búa? Eflaust er pláss fyrir það í Síberíu, en ef það hefði verið þétt byggð þar árið 1908, þá hefði loftsteinn eða halastjarna drepið hundruði þúsunda ef ekki milljóna.

Staðreyndin er sú að stór hluti jarðarinnar er hættulegur staður og stór hluti jarðarbúa neyðist til þess að lifa á hættulegum stöðum. Eina ástæðan fyrir því að presturinn kemur með svona heimskulega tillögu er sú að hann þarf að bjarga guðinum sínum.

Kristið fólk trúir því að algóður guð hafi skapað jörðina. Það á auðvitað í erfiðleikum með að útskýra það hvers vegna algóður guð myndi skapa hættulega jörð, og þess vegna koma prestar eins og Sigurður Árni með svona bull.

Biskupinn enn í skápnum – afvegaleiddur íhaldsmaður

Nú eru næstum því liðnar tvær vikur frá því að ég sendi Kalla biskupi bréf þar sem ég spurði hann út í það hvort hann myndi vilja staðfesta samvist samkynja pars. Ástæðan var auðvitað sú að 24 stundir höfðu sent Kalla fyrirspurn en greyið maðurinn hafði ekki tíma til þess að svara þeim, í heila þrjá daga.

Það er auðvitað sorglegt að Kalli hafi ekki þor til að segja einfaldlega „Ég neita að svara“ eða „Nei“ (sem allir vita hvort sem er að er afstaða hans).  Starfsmenn 24 stunda bentu að sjálfsögðu á þetta í blaði sínu, Björg Eva Erlendsdóttir í leiðara blaðsins:

Sorglegasti minnihlutahópurinn og jafnframt sá minnsti er sjálfur biskupinn yfir Íslandi. Hann lét ekki ná í sig og hafði þó þrjá daga til að svara einfaldri spurningu. Furðu sætir ef biskupinn þarf langan umhugsunartíma um eigin afstöðu í máli sem hefur verið rætt í þaula innan kirkjunnar í mörg ár. Það er leitt að biskupinn skuli velja að koma ekki út úr skápnum með afstöðu sína til staðfestrar samvistar, eftir allan þennan tíma. Flótti biskups verður enn ónotalegri þegar rifjaður er upp ferill málsins og fyrri ummæli hans um hjónabandið og mannréttindi samkynhneigðra.

 

Á næstu síðu í næsta blaði skrifaði Elín Albertsdóttir þetta:

 

Karl Sigurbjörnsson, hafði ekki tíma til að svara einni já eða nei spurningu 24 stunda fyrir helgina þegar allir prestar landsins voru spurðir hvort þeir myndu staðfesta samvist samkynhneigðs pars. Erindið lá ljóst fyrir í nokkra daga en samt gaf Karl ekki færi á sér. Líklegt þykir að Karl hafi ekki viljað gefa upp skoðun sína á þessu máli sem flestir eru fullvissir um að sé íhaldssöm og gamaldags.

Ég held að flest hugsandi fólk sjái hversu ömurlegur þessi flótti Kalla biskups sé. Frelsisverjan Gísli Freyr Valdórsson er líklega ekki í þeim hópi, en hann bæði misskildi þetta herfilega og telur þessar lygar Kalla vera réttlætanlegar. Túlkun hans á málinu er: „24 stundir ræðst á biskupinn“. Hann segir:

 

Björg Eva Erlendsdóttir húðskammar biskup fyrir að svara ekki blaðinu.

Nei, Björg Eva húðskammar biskupinn fyrir að „[láta] ekki ná í sig og hafði þó þrjá daga til að svara einfaldri spurningu.“ Það er munur á því að segja: „Ég neita að svara.“ og „Ég hef ekki tíma til þess að svara einfaldri já-eða-nei-spurningu í heila þrjá daga“.Um hinn blaðamanninn segir Gísli:

 

[Elín] gerir lítið úr biskup fyrir að svara ekki beiðni blaðsins...

Nei, hún skrifaði: „Karl Sigurbjörnsson, hafði ekki tíma til að svara einni já eða nei spurningu 24 stunda fyrir helgina....“ og „Erindið lá ljóst fyrir í nokkra daga en samt gaf Karl ekki færi á sér.“

Ímyndum okkur að Geir H. Haarde eða Ingibjörg Sólrún Gísladóttir væru spurð að því hvort þeim fyndist að Ísland ætti að ganga í Evrópusambandið og svarið væri: "Ég hef bara engan tíma til þess að svara þessu næstu þrjá daga.", sem er reyndar örlítið trúlegt þegar um þessa aðila er að ræða.

En kannski er þetta bara nýja taktíkin hjá Biskupsstofu, þau vita að Kalli er alveg hræðilegur talsmaður Þjóðkirkjunnar og það sé best að læsa hann inn á skrifstofu og segja að hann sé svo rosalega upptekinn að hann hafi ekki einu sinni tíma fyrir eitt „Já“ eða „Nei“.

Eldklerkur segir að guð hati Súðvíkinga

Í svokallaðri „goslokamessu“ í Seljakirkju lýsti þjóðkirkjupresturinn Ólafur Jóhann Borgþórsson guðinum sínum á þann hátt að guðinn hans virðist hata Súðvíkinga.

Í stuttu máli sagði klerkurinn að það væri „staðreynd að algóður skaparinn“ hefði vakað yfir Eyjamönnum nóttina þegar Heimaey gaus árið 1973. Klerkurinn segir að guðinn hans hafi:

1.       Valdið því að „flotinn hafi allur verið í höfn og í stakk búinn til að ferja fólk yfir“

2.       Valdið því að „vindátt hafi verið af vestri en ekki af austri“

3.       Valdið því að „jarðsprungan hafi ekki opnast nokkur hundruð metrum vestar en raunin varð“

Mér finnst það frekar broslegt að hugsa til þess að þessi prestur haldi að guðinn sinn hafi viljað bjarga Eyjamönnum og þess vegna fært gosið um nokkur hundruð metra, lagað vindáttina og séð til þess að það væri nóg af skipum. Hvers vegna ekki bara að koma í veg fyrir gos yfir höfuð eða láta það enda lengst út í hafi, svona eins og hann gerði með Surtseyjargosið?

En fyrst guðinn hans Ólafs stundar það að ákveða staðsetningar á náttúruhamförum, þá hljótum við að spyrja okkur að því hvers vegna hann ákveður stundum að láta náttúruhamfarir lenda beint á mannabyggðir, svona eins og í snjóflóðinu í Súðavík. Guðinum hans hlýtur bar að vera svona illa við þetta fólk.

Ef við ímyndum okkur að einhver manneskja gæti með engri fyrirhöfn hafa látið snjóflóðið við Súðavík stoppa rétt fyrir utan ystu hús þorpsins, en gerði það ekki, þá held ég að það væri mjög eðlilegt að álykta sem svo að sú manneskja væri mjög ill. Sami mælikvarði hlýtur að gilda á fornaldarlega guðinn hans Ólafs.

Greyið Karl biskup að kafna í vinnu

Neðst til vinstri á opnunni þar sem þessi frétt er í 24 stundum er þessi undarlegi dálkur:

Tímabundinn

Eftir ítrekaðar tilraunir til að
leggja spurningu 24 stunda
fyrir Karl Sigurbjörnsson
biskup fengust þær upplýsingar
frá Biskupsstofu að Karl
hefði ekki tíma til að svara,
þrátt fyrir að erindi blaðsins
hafi legið ljóst fyrir.

Hafði biskupsgreyið ekki tíma til þess að svara spurningunni: "Ef samkynhneigt par biður þig að staðfesta samvist sína í kirkju, munt þú gera það?" Auðvitað ekki.

Staðreyndin er auðvitað sú að Kalli myndi aldrei gera það, en hann þorir ekki að svara spurningunni. Það hlýtur að hafa verið vandræðaleg augnablik á Biskupsstofunni þegar almannatengslafólkið og biskupinn voru að ræða um þetta.

Að biskupinn hafi ekki haft tíma til þess að svara þessu er auðvitað lygi, annað hvort kominn frá biskupnum sjálfum eða einhverjum öðrum starfsmanni kirkjunnar.

En leyfum Kalla að njóta vafans, rétt í þessu var ég að senda honum eftirfarandi tölvupóst. Við skulum vona að hann muni fá mínútnu frið til þess að skoða tölvupóstinn sinn í næstu viku. Greyið maðurinn er örugglega bara svona svakalea upptekinn. Skal láta vita hvort ég fái svar:

Sæll Karl Sigurbjörnsson

Ég hlakkaði afskaplega mikið til að sjá svar þitt í 24 stundum í dag, en ég varð fyrir miklum vonbrigðum þegar það kom í ljós að þú varst svo afskaplega upptekinn að þú gast ekki svarað einni spurningu, þrátt fyrir "ítrekaðar tilraunir" blaðamanna.

Ef þú hefur tíma til þess að lesa þennan tölvupóst, þá hefði ég afskaplega gaman af því ef þú gætir svarað spurningunni sem fréttamaðurinn lagði fyrir þig. Ef þú hefur ekki tíma núna til þess að ýta á "svara" og skrifa "já" eða "nei", þá get ég alveg beðið. Vonandi verðurðu ekki svona afskaplega upptekinn allt til starfsloka.

Hérna er spurningin: "Ef samkynhneigt par biður þig að staðfesta samvist sína í kirkju, munt þú gera það?"

bestu kveðjur, Hjalti Rúnar Ómarsson

Hýrnar yfir kirkjunni